Einn blindfullur

  Ofurölvi náungi bröltir út af kránni.  Hann dettur strax á gangstéttinni fyrir utan og kútveltist niður í göturæsið.  Hann margdettur aftur á meðan hann reynir að standa upp.  Að lokum tekst honum að standa upp og skjögrar af stað.  Honum gengur illa að halda jafnvægi vegna þess að hann gengur með annan fótinn uppi á gangstéttinni og hinn niðri í ræsinu.  Hann heldur áfram að detta ítrekað og reisa sig upp með sömu erfiðismunum og áður.  Og heldur áfram að skakklappast með annan fótinn uppi á gangstéttinni og hinn niðri í ræsinu.

  Lögreglubíl er ekið hjá.  Bíllinn stoppar,  lögreglumaður vindur sér að þeim fulla,  tekur undir handlegginn á honum og segir valdmannslega:  "Þú kemur með okkur niður á stöð.  Þú ert ósjálfbjarga vegna ölvunar."

  Sá fulli horfir furðulostinn á lögreglumanninn og spyr:  "Er ég fullur?  Ertu viss?  Ertu alveg viss?"

  Lögreglumaðurinn svarar:  "Það leynir sér nú ekki.  Þú ert gjörsamlega á skallanum."

  Sá fulli hendir sér fagnandi í fangið á lögreglumanninum og hrópar:  "Dásamlegt!  Dásamlegt!  Ég hélt ég væri orðinn fatlaður!"